Üsen Turnkamerad isch am 17.11.1948 in Chur by Bad Ragaz gebore
das muess stimme, er schwimmt sehr gern

syn Vater hät e Beckerei gha
das muess stimme, er verschlinggt zwüschedure au gern Süsses

Uufgwachse isch er in Bertschikon b. Gossau im Zürioberland
das muess stimme, er redet unüberhörbar Züridütsch

er hät gern, wenn d’Chemie stimmt
das muess stimme, er isch Chemiker worde

in Züri findet er kei Stell als Chemiker
das muess stimme, wäge dem isch er uf Basel uusgwandered
und zum Glück für üs alli im März 1983 uf Brattele i‘s Baselbiet züglet

er hät immer gern Sport triebe
das muess au stimme, er fahrt es ganz eifachs Velo

Aber öppis hät ihm eifach gfählt,
en richtige Verein mit guete und stimmige Kolleginne und Kollege
das muess stimme, kein gringere als dr Turner und Faschnochbur Oli Bally hät ihn zum Mitmache im TV AS motiviert

Am 01.10.1987 isch er i d Abteilig Allgemein Herre yträte
es hät em sofort gfalle, by dene underschiedliche Talent und Rueche vo domols, dr René, dr Felix, dr Georges, dr Walti, dr Ueli, dr Fritz usw., dr Sprechendi uusgnoh

scho zwei Johr spöter isch üsen Turnkamerad zum Präsident vo dr Abt. Allgemein Herre gwählt worde

er hät vo afangs 1989 bis Endi 1993 ganzi fünf Johr lang en Super-Job gmacht fürs Turne i dr AS und syn ganze Ysatz au als Mitglied vom grosse AS-Vorstand erbrocht

Guet fünf Johr spöter isch er denn i dr Abt. Allgemein Herre müed worde und hät's Beschti gmacht, wo en Turner noch der Aktivturnerzyt cha mache – er isch am 12.03.1999
i d Männerriegi vo dr AS yträte

Dört hät er zum Teil di glyche Talent und Rueche wieder aatroffe, wie scho früener i dr Abt. Allgemein Herre, dr René, dr Felix, dr Georges, dr Walti, dr Ueli, dr Fritz und neu no dr Edi, dr Dini, dr Ruedi Wysschopf, dr Mäni usw. dr Sprechendi wiederum uusgnoh
Es hät au wieder nume zwei Johr duured und scho isch üsen Turnkamerad Techn. Leiter vor dr Männerriege worde, das am 10.11.2001

Das Amt führt er hüt no mit viel Bravour und  grosser Umsicht
Eini vo de viele Spezialitäte vo üsem Turnkamerad isch s Organisiere vo dr jöhrliche zweitägige Velotour

Do drby chan er sys Organisationstalent voll entfalte
Erstuunlich dr by isch, das mr uf dene Toure immer neume chöned schloefe und au immer gnueg z‘ässe  und z‘tringge händ

Alles was üsen Turnkamerad i d Händ nimmt hät au Füess, äs isch immer alles guet duredänggt und nochvollziehbar, das isch eher e bitz atypisch für en Akademiker

Will üsen Turnkamerad – dr Hans Graf – derewäg viel gmacht hät und no immer macht für dr Turnverein AS und bereits im Johr 2006 vom Baselbieter Turnverband für sini Vereinstätigkeit vo domols scho 15 Johr am Stuck uuszeichned worde isch, schlönd dr Turnerrot und dr Vereinsvorstand üsen Turnkamerad Hans Graf a dr hütige Vereinsversammlig zur Ernennig zum Ehremitglied vor, verbunde mit de beschte Wünsch für di wyteri turnerischi Laufbahn i synere gliebte AS.