|
Alles het do dr mit agfange, dass d AS vor guet 6 Johr e Vorstandsuffrischig brucht het, und het us dem Grund e Gruppe motivierti ASler zumene Brönsch-und Trottinett-Plausch uf d Wasserfalle iglade.
Do dr bi si ganz intressanti Mensche zämme cho. D Idee isch gsi, Persone wo alli ziemlig die glichi Softwär hei und sich au sunscht guet kenne zumene Ämtli im Vorstand vo dr AS chönne z begeischtere.
D Rechnig isch voll ufgange will sich grad 3 Persone entschiede hei – jewohl do mache mir mit – mir si dr bi!!! Das AS Schiff witerhin uf Kurs z halte. Zwei dr vo hei nach 5 Johr Isatz zum Wohl vom Verein, ihres Amt chönne witergeh. Ei Person isch zum Glück no an Bord blibe - - - will dr Jürg e sone liebe Mensch isch und nid eifach sis Amt abgit, ohni dass er e Nochfolger het.
Aber und das het er jetze ganz klar und dütlich gseit: in dem Johr mueses e Lösig geh, ohni wenn und aber - - -
E Blick in Rückspiegel zeigt: –dass er 3.und 2.Liga-Spieler gsi isch. Die 1.Liga isch numme e Traum blibe – aber träume darf me jo - - -
Spöter denn imene fusionierte Team und zitwise dört – wo eifach no eine gfehlt het!!
Sogar au mit dr Sprossewand het er gspielt – mängmol im gliche Team – mängmol au als Gegner, bis er denn gmerkt het, dass d Sprossewand stärker isch - -
Im Lauf vo de Johre isch denn dr Jürg au e chli ruhiger worde, me cha au säge kreativer, das het ihn denn bewoge, e Umschuelig z mache - zumene kreative Passör! Mit sine seeehr überraschende Kunstpässe het er dr Gegner -und no meeh - die eigene Mitspieler am meischte überrascht
Us eigener Erfahrig darf i mitteile, dass i mit em Jürg binere Nacht und Nebelaktion
einigi ganz gmüetligi und unvergessligi Stunde erläbt ha. D Lachmuskle si bis ans üsserschte strapaziert worde, wenn de weisch was i mein?
Sunnscht isch dr Jürg e polysportive Hobbysportler au hüte no, vom Schifahrer – bis zum OL Läufer cha er igsetzt werde, er isch e sehr e Mannschtfsdienliche Kamerad. Binere Wanderig im Wallis isch er emol gstürtzt – zum Glück nid fescht – er isch nämlig in e Konditionsloch g heit – worum au immer blibt offe…denn het er sofort gmerkt, wenn er ruckwärts dr Berg ablauft, dass sini Chnü und Oberschenkel das sehr dankend anehme, dr Jürg isch immer sone ufgstellte – gsellige – hilfsbereite und was es sunscht no alles z lobe gebti – e Person – wenn’s die nid gäbti – denn müesste me se erfinde!
Bi jeder Hundsverlochete oder sunnscht amene Chäferfescht – zellt er meistens s Münz – bi andere Glägeheite setzt er sich i – zum Wohl vo de Sportverein, das git ihm wieder Bonus – wo er denn duet ilöse – wenn zum Bispiel e Sitzigstermin vergässe wird.
Anhand vo dene viele guete und vorbildliche Erinnerige
Darf i im Jürg - - he - wer isch dr Jürg?
Ouhh – das isch mir jetze no ni passiert – entschuldigung an alli - wo Jürg heisse!!!
Im Name vo dr ganze AS darf i im “ Manfred Portmann “ ganz härzlig zum Ehremitglied gratuliere!
Walter Suter
|